පතිවතේ බෙලෙන් රටක් සෙලවූ කන්නගී “පත්තිනි” නමින් හෙළ සිනමාවට

පඬි රට ගිණි තබන්නට තරම් අගේ පතිවත බලවත් විය. එවන් පතිවෘත්තා ධර්මයක් සුරැකි කන්නගී ක්‍රි.ව දෙවැනි සත්වර්ෂය තරම් වූ ඉතිහාසයක සිට විවිධ කලා නිර්මාණ හරහා, ධර්මයන් හරහා ,විවිධ කතිකාවන් හරහා වරින් වර ඉස්මතු වෙයි. ඉන්දියාව සොළී, පඬි, කේරළ යන රාජ්‍ය තුනකින් සැදුම් ලත් යුගයක පත්තිනි දේවිය උපන්නේ ඉන්දියාවේ පඬු රට මධුරෙයි නගරයෙහි ය. කන්නගී නමැති මනුෂ්‍ය ආත්මයේදී පඬි රට ඉපිඳ පති වතේ බලය පෙන්වූ ඇය කෝරළ රාජ්‍යයේදී දේවත්වයට පත් වෙයි. ඉන්දියාවේ පඬි රට සිදුවූ මේ ඓතිහාසික සිදුවීම සහ ඒ හා බැදුණු සිද්ධීන් මෙන් ම මති මතාන්තර පිළිබඳ අසල්වැසි රටක් වූ අප රටේ ජනතාව තුළ ද යම් අවබෝධයක් පවතී. පත්තිනි දේවිය ලෙස පිදුම් ලබමින් විශේෂයෙන්ම දමිළ ජනතාවගේ භක්ති ආදරයට බදුන් වූ මෙම වෘත්තාන්තය මේ දිනවල හෙළ සිනමාවට නැගෙමින් පවතී. මෙම මාහැඟි කර්තව්‍යයට අතගසා තිබෙන්නේ මහාචාර්ය සුනිල් ආරියරත්නයන් විසිනි.

පුජා උමාශංකර් විසින් ඓතිහාසික කංනගී ගේ චරිතයට පණ පොවනු ලබයි. එමෙන් ම රවින්ද්‍ර රන්දෙණිය පඬි රජ ලෙසත් , දයා අල්විස් රන් කරු ලෙසත් මෙහි චරිත සඳහා රංගනයෙන් දායකත්වය සපයන අතර “සමනළ සංධ්වනිය” , “මහරජ ගැමුණු” චිත්‍රපට හරහා තම රංග පෞර්ශය හෙළ සිනමාවේ සුදීපවත් කළ උද්ධික ප්‍රේමරත්න කංනගී ගේ සැමියා හෙවත් කෝවලන් ගේ චරිතය නිරූපණය කරනු ලබයි.

තිස්සමහරාමයේ රන්මිණිතැන්න ප්‍රදේශය අවට දැඩි හිරු රැසින් බැට කමින් ඉතා වෙහෙසකරව මෙම නිර්මාණය උදෙසා දායකත්වය සපයන අධ්‍යක්ෂක වරයා ඇතුළු නළු නිළි පිරිස ඇතුළු සියලු දෙනා ඔවුන්ගේ උපරිම ශක්තිය යොදවන්නේ ගුණාත්මක බැවින් පිරිපුන් නිර්මාණයක් හෙළ සිනමාවට දායාද කිරීම වෙනුවෙනි.